Ljósanæturkeppnin verður haldin
LAUGARDAGINN 4. september 2010

Keppt verður um SPARISJÓÐSBIKARINN
Siglt verður frá Reykjavík til Keflavíkur

Skipstjórafundur kl. 9:00
A flokkur báta með forgjöf < 0.970 verða ræstir kl. 9:30
B flokkur báta með forgjöf ≥ 0.970 verða ræstir kl. 10:00

Keppt verður samkvæmt IRC-forgjöf og keppnisreglum ISAF 2009-2012.

Skráningargjald er 1.000 kr. á áhafnarmeðlim. Þátttaka tilkynnist í athugasemdakerfinu fyrir miðnætti á föstudag. Gefa skal upp skip, seglanúmer, forgjöf, fjölda í áhöfn og skipstjóra.

Um helgina verður þéttskipuð dagskrá. Sjá nánar á ljosanott.is.

Keppnisstjórn Brokeyjar sá um þessa keppni í nokkuð stöðugri suðaustanátt. Sigldur var hringur um Engey og sjöbauju og dró nokkuð sundur með bátunum.

Eitthvað fór úrskeiðis í startinu þegar Dögun nuddaðist utaní Sigurborgina og sat síðan eftir með undrunarsvip á ráslínunni. Þeir náðu sér þó fljótt á strik aftur og enduðu í þriðja sæti. Fleiri myndir er að finna í myndasafninu.

Smellið á 'nánar' til að sjá úrslitin:

Brokey verður að vanda með opið hús í félagsheimilinu Ingólfsgarði á menningarnótt frá 21:30. Veitingar við allra hæfi að hætti hússins. Hlökkum til að sjá sem flesta.

Núna um helgina bættust þrír nýir Íslandsmeistarar við þá þrjá sem fyrir voru í Brokey þegar keppt var á kænum í allskonar veðri á Akureyri. Brokey átti fulltrúa í öllum flokkum þetta árið nema þar sem keppt var í opnum flokki með Portsmouth-forgjöf, alls fjórum flokkum af fimm. Metþátttaka var annars á mótinu, 60 manns að keppa á 53 bátum og sjón að sjá öll seglin samankomin á Pollinum.

Við bendum á að nú er hægt að leigja báða micro 18-bátana sem eru við bryggjuna (Díu og Míu) til skemmri siglinga á sundunum. Leiguverð á bát miðað við þriggja tíma siglingu er aðeins 12 þúsund fyrir almenning og 8 þúsund fyrir félagsmenn í Brokey (nóg að einn leigutaki sé félagsmaður). Báðir bátarnir eru undir sex metrum og eru því tilvalið tækifæri fyrir þá sem vilja æfa sig fyrir réttindapróf. Best er að vera tveir til þrír að sigla í senn.

Auglýsingin hérna hangir á félagsheimili Brokeyjar. Þar eru nánari upplýsingar og símanúmer.

Það var áhöfnin á Ögrun sem bauð upp á krefjandi braut í þetta sinn í ágætlega hvassri vestanátt með sólina í hámarki og öldu í lágmarki. Siglt var út fyrir Engeyjarrifsbauju að Hjallaskeri, svo aftur að Engeyjarrifi og þaðan að Kirkjusandi, að Sólfarinu, aftur að Engeyjarrifi og Kirkjusandi, síðan pulsa um Sólfarsbauju og Kirkjusandsbauju og í mark, allt á rúmum einum og hálfum tíma. Tur-báturinn Yrsa tók þátt en ekki tókst að grafa upp forgjöf fyrir hann.

Hérna er mynd af brautinni:

Smellið á 'nánar' til að skoða tímana.

Síðasti dagur Íslandsmótsins var langur og strangur þar sem sigldar voru fimm mislangar umferðir bæði innan og utan eyja með einu hálftíma matarhléi. Ráslína var alltaf á sama stað við Brokeyjarbauju við Ingólfsgarð enda hélst austanáttin nokkuð stöðug allan tímann. Fyrst var sigldur stuttur þríhyrningur um Kirkjusandsbauju og Engeyjarrifsbauju, síðan aðeins lengri þríhyrningur um Kirkjusandsbauju og Hjallaskersbauju og síðan nokkuð löng braut um Kirkjusandsbauju, Akureyjarrifsbauju, nýja bauju á Viðeyjarflaki og Kirkjusandsbauju aftur. Síðan var aftur tekin braut tvö og að síðustu fyrsta brautin aftur.

Þótt vindur væri nokkuð stöðugt að austan þá var veðrið mjög breytilegt; stundum datt í dúnalogn en jafnan rauk vindurinn upp aftur, stundum svo snögglega að hann gerði keppendum erfitt fyrir. Síðdegis leið snekkja Paul Allen inn að Laugarnesi og var eins og ný eyja þarna við brautirnar sem sveigði vind og skýldi. 

Um kvöldið voru svo úrslitin tilkynnt í Víkinni, sjóminjasafni Reykjavíkur, og verðlaunaafhending fór fram: Smellið á 'nánar' til að skoða úrslitin:

Þetta var blautur fyrsti keppnisdagur með mjög mishvassri sunnanátt. Fyrst var sigldur stuttur þríhyrningur með pulsu í endann og síðan ögn lengri leið norður fyrir Engey. Eftir það var snædd lambasteik sem Birgir Ara og Hannes hússtjóri grilluðu af stakri snilld. Íslandsmeistararnir á Dögun leiða eftir þessar fyrstu tvær umferðir en litlu munaði á bátunum í leiðréttum tíma: aðeins sjö sekúndur skildu þá frá Xenu í annarri umferð sem dæmi. Reynt verður að sigla að minnsta kosti fimm umferðir á morgun þannig að enn getur allt gerst.

Hérna eru svo nokkur móment úr keppninni klippt saman í stutt myndband á siglingarásinni:

Nú er ljóst að lægðin sem spáð er á morgun verður utar í flóanum þannig að okkur er ekkert að vanbúnaði að hefja keppni samkvæmt áætlun með skipstjórnarfundi kl. 13:00 á morgun, föstudag.

Fyrirkomulag verður þannig að sigldar verða eins margar umferðir og við komumst upp með en að keppni ljúki fyrir kvöldmat. Á bryggjunni verður boðið upp á grillað lambakjöt og gos, og einhverjar enn léttari veitingar verða til sölu gegn vægu verði.

Á laugardag hefst skipstjórnafundur kl. 9:00 um morguninn. Þar verður boðið upp á morgunmat; brauðmeti og kaffi, svo enginn þarf að fara svangur af stað. Við mælumst til þess að menn séu fullnestaðir fyrir daginn, þar sem ekki mun gefast tími til að fara í land og borða. Tvö hálftíma hlé verða yfir daginn þannig að menn nái að hvílast aðeins og næra sig um borð í bátunum.  Aftur verða sigldar eins margar umferðir og við komumst upp með en miðað við að keppni ljúki klukkan 18:00.

Ætlunin er að gera tilraun með að senda röðina eftir hverja umferð með SMS í farsímanúmer sem við biðjum skipstjóra að láta okkur í té á fyrsta skipstjórafundi. Þannig geta menn áttað sig á því hvar þeir standa í mótinu meðan á því stendur.

Milli klukkan 18:00 og 21:00 lýkur kærunefnd störfum og keppnisstjórn veit hver endanleg uppröðun er. Þá hafa keppendur tækifæri til að skipta um föt og fá sér kvöldmat. Klukkan 21:00 verður verðlaunaafhending og hátíðardagskrá í Víkinni, Sjóminjasafni Reykjavíkur, Grandagarði. Þar verður hægt að kaupa drykki. Allir sem áhuga hafa á siglingaíþróttum eru hjartanlega velkomnir og við hvetjum ykkur eindregið til að taka með ykkur gesti. Dagskránni lýkur um 23:00. 

Íslandsmót í kjölbátasiglingum verður haldið í Reykjavík helgina 6.-8. ágúst næstkomandi. Smellið á 'nánar' til að skoða tilkynninguna. 

Fyrirkomulag varðandi mat og verðlaunaafhendingu verður nánar kynnt síðar á þessari síðu.

Eins og er lítur ekki vel út með Íslandsmót á föstudegi þar sem spáð er 10-12 m/s og ausandi rigningu. Hugsanlega mun því fyrsti keppnisdagur frestast til laugardags og annar keppnisdagur og verðlaunaafhending til sunnudags. Ef ekkert breytist verður tilkynnt um frestun á morgun. Þá verður líka gefið út fyrirkomulag með mat keppnisdagana og staðinn þar sem verðlaunaafhending fer fram.

Við minnum svo á að frestur til að tilkynna um þátttöku rennur út í kvöld.